Derrigorrezko Bigarren Hezkuntza (DBH), hamabi urtetik hamasei urte bete bitarteko ikasleen derrigorrezko hezkuntza da.
Nerabezaroaren adin honetan, haur izatetik heldutasunerako bidean, ikasleek autonomia eta ardurak hartzea garatuko dituzte.
Etapa honetako helburuak dira: Ikasleak kulturaren oinarrizko elementuez jabetzea, ikasteko nahiz lanerako ohiturak garatzea eta finkatzea, ondorengo ikasketak egiteko eta lan-munduan sartzeko prestatzea, eta bizitzan herritar gisa dituzten eskubideak eta betebeharrak gauzatzeko prestatzea. 
EKI PROIEKTUA, ARDATZ
EKI proiektua, Ikastolen Elkarteak sorturiko proiektu integrala da eta DBH osoan eskaintzen da. Europa mailan saritutako materialaz lantzen da eta helburu nagusia, ikaslea bizitzarako prestatzea da.
Baliabide metodologiko honen bidez:
- Ikasleak, konpetentziak (oinarrizkoak eta diziplinarrak) eta bizitza pertsonaleko zein sozialeko egoerei aurre egiteko beharrezkoak diren trebetasunak bereganatuko ditu.
- Integrazio pedagogikoa ardatz izanik, ikasleak ezagutzak barneratuta dituenean, transferitu eta integratu egingo ditu berarentzat esanguratsuak diren egoeretan, konpetentea dela erakutsiz.
- Euskara ardatz duen eleaniztasuna bideratzen du. DBHko 3. eta 4. mailetan SSLIC, hau da, Gizarte Zientziak ingelesez lantzen dira. Era berean, Eleanitz proiektuaren baitan, frantsesa etapa osoan zehar ikas daiteke hautazko gai gisa; kasu honetan, hizkuntza horren lehen hurbilketa egitea da helburua.